Apple iPhone üçün hazırladığı iOS 27 əməliyyat sisteminin səkkizinci beta versiyasını yayımlayıb. iOS 27 Beta 8 avqustun 31-də əvvəlcə tərtibatçılar üçün istifadəyə verilib və artıq ictimai beta istifadəçiləri üçün də əlçatandır.

Tvit.az xəbər verir ki, yeni versiya iOS 27-nin yekun buraxılışına yaxınlaşdığını göstərir. Buna görə də Beta 8-də əsas diqqət yeni böyük funksiyalardan daha çox sistemin sabitliyinin artırılmasına, səhvlərin aradan qaldırılmasına və performansın yaxşılaşdırılmasına yönəlib.

iOS 27 ilə iPhone-lara daha ağıllı Siri və süni intellekt imkanları, yenilənmiş interfeys, Foto tətbiqində yeni AI alətləri, Safari-də əlavə imkanlar və digər dəyişikliklər gələcək. Beta 8 isə bu funksiyaların yekun versiyaya daha stabil şəkildə hazırlanması mərhələlərindən biridir.

Son beta versiyada bəzi cihazlarda mobil bağlantının, axtarış funksiyalarının və klaviaturanın işinin yaxşılaşdırıldığı, həmçinin müxtəlif sistem xətalarının aradan qaldırıldığı bildirilir.

Apple-ın iOS 27-nin yekun versiyasını sentyabr ayında təqdim etməsi gözlənilir. Beta 8 isə son mərhələdəki sınaq versiyalarından biri hesab olunur.

Aysel Şirinova