ABŞ Rusiyanın Avropaya qaz tədarükünü əvəz etməyi, həmçinin qitəyə neft ixrac etməyi və atom reaktorları qurmağı planlaşdırır.

Tvit.az xəbər verir ki, bunu ABŞ Energetika Nazirliyinin rəhbəri Kris Rayt bildirib.

“Avropada ABŞ-dən rus qazının tam əvəzlənməsi üçün tələbat artır. Biz mayeləşdirilmiş təbii qazın (MTQ) ixracını artıracağıq, həmçinin neft və neft məhsullarının ixracını da genişləndirəcəyik. Nəticədə Avropaya nüvə texnologiyaları və yeni nüvə reaktorları da çatdırılacaq”.

Raytın sözlərinə görə, Avropa 2026-cı ilin sonuna qədər Rusiya qazının alınmasından tamamilə imtina etməyi planlaşdırır.

“1 yanvar 2027-ci ildən etibarən Rusiya qazı [Avropaya] daxil olmayacaq”, – deyə o bildirib.

Avropa Komissiyası bu yaz Aİ ölkələrinin 2027-ci ilin sonuna qədər Rusiya nefti və qazı almasını tam qadağan edən plan təqdim edib. Bu qadağa Ukraynadakı münaqişə bitdikdən sonra da qüvvədə qalacaq. Hazırda Avropa Komissiyası oxşar planı – Rusiya nüvə texnologiyaları və nüvə yanacağının qadağan olunmasına dair – hazırlayır və onun oktyabrda təqdim olunacağı gözlənilir.