Mövsümi tükənmişliyə üç əsas əlamət işarə edə bilər: səbəbsiz yaranan əsəbilik, 10-15 dəqiqədən artıq bir işə diqqəti cəmləyə bilməmək və görülən işlərdə mənasızlıq hissi.

Tvit.az xəbər verir ki, bu barədə MİREA - Rusiya Texnologiya Universitetinin Humanitar və Sosial Elmlər kafedrasının dosenti Yelena Şpaqina Gazeta.ru-ya açıqlamasında bildirib.

Onun sözlərinə görə, mövsümi tükənmişlik tənbəllik və ya iradəsizlik deyil, orqanizmin temperatur, işıq və psixoemosional stresin təsirinə verdiyi reaksiyadır.

Mütəxəssis üç əsas xəbərdarlıq əlamətini qeyd edib:

- Səbəbsiz əsəbilik: Klaviatura səsi, həmkarın sualı və ya digər xırda amillər belə insanı qıcıqlandıra bilər.

- Diqqətin tez yayınması: İnsan 10-15 dəqiqədən artıq bir işə diqqətini cəmləyə bilmir və fikrini toplamaq üçün ciddi səy göstərməli olur.

- Mənasızlıq hissi: Hətta uğurla tamamlanan iş belə insana məmnunluq gətirmir.

Şpaqina bildirib ki, bu əlamətlərdən ən azı ikisi üç gündən artıq davam edirsə, vəziyyəti sadəcə pis əhvali-ruhiyyə kimi qiymətləndirmək olmaz. Bu halda gündəlik rejimə yenidən baxmaq lazımdır.

Psixoloqun sözlərinə görə, insanların bu mərhələdə etdiyi əsas səhv özlərini zorla daha məhsuldar olmağa məcbur etmələridir. Yorğunluqla mübarizə apardıqca və məhsuldarlığa daha sərt nəzarət etdikcə, qalan enerjinin daha sürətlə tükənməsi mümkündür.

Mütəxəssis hər saat yarımdan bir 15 dəqiqəlik fasilə etməyi, bu zaman iş masasından qalxaraq gəzməyi, açıq havaya çıxmağı və ya ekranlardan uzaqlaşmağı tövsiyə edir.

O həmçinin yay aylarında gün ərzində bütün planları yerinə yetirməyə çalışmaq əvəzinə, ən vacib işləri tamamlayıb dayanmağı məsləhət görüb. Gündəlik iş yükünün 20-30 faiz azaldılmasının səmərəliliyin itirilməsi deyil, uzunmüddətli fəaliyyət qabiliyyətinin qorunmasına yönəlmiş addım olduğunu vurğulayıb.