Çində benzinlə işləyən minik avtomobillərinin pərakəndə satışları avqust ayında illik müqayisədə 40% azalıb. Eyni dövrdə yeni enerjili nəqliyyat vasitələrinin (NEV) bazar payı rekord həddə – 65,2%-ə yüksəlib.

Tvit.az xarici mediaya istinadən xəbər verir ki, Çin Sərnişin Avtomobilləri Assosiasiyasının (CPCA) məlumatına görə, avqustda ölkədə ümumilikdə 1,54 milyon minik avtomobili satılıb. Bu, ötən ilin eyni ayı ilə müqayisədə 23,6%, iyul ayı ilə müqayisədə isə 5,5% çoxdur.

NEV satışları illik müqayisədə 10,1% azalaraq 1,005 milyon ədəd təşkil edib. Bunun 698 mini tam elektrikli avtomobillər (BEV), 307 mini isə plug-in hibridlər (PHEV) olub. BEV satışları illik 1,7% artıb, PHEV satışları isə 25,8% azalıb.

Avqustda daxiliyanma mühərrikli avtomobillərin (ICE) satışı təxminən 536 min ədəd olub və onların bazar payı 34,8%-ə düşüb. CPCA yanacaqla işləyən avtomobillərə tələbatın azalmasını qismən artan istismar xərcləri, o cümlədən benzin qiymətlərinin yüksəlməsi ilə əlaqələndirib.

Yanvar-avqust aylarında Çində 11,7 milyon minik avtomobili satılıb. Bu dövrdə NEV satışları 6,7 milyon, ICE avtomobillərinin satışları isə 5 milyon ədəd təşkil edib.

Aysel Şirinova