ABŞ 2026-cı il dünya çempionatında iştirakı nəzərdə tutulan İraq milli komandasının beş futbolçusuna viza verməkdən imtina edərək gözlənilməz qərara imza atıb.

Tvit.az xəbər verir ki, bu barədə "Goal" portalı məlumat yayıb.

İraq Futbol Federasiyasının rəsmisi Qaleb əz-Zameli viza ala bilməyən oyunçuların adlarını ictimaiyyətə açıqlayıb. Bunlar İbrahim Bayeş, Möhənəd Əli, Zeyd Təhsin, Heydər Əbdülkərim və Əli əl-Həmadidir.

"Hazırkı anadək bu qərarın səbəbləri bizə məlum deyil", - deyə təşkilat nümayəndəsi mövzu ilə bağlı danışarkən qeyd edib.

Əz-Zameli vurğulayıb ki, İraq Futbol Federasiyası yaranmış problemin həllini tapmaq məqsədilə Beynəlxalq Futbol Federasiyasına (FIFA) müraciət etmək niyyətindədir, çünki adları çəkilən şəxslər komandanın əsas fiqurları hesab olunurlar.

Xatırladaq ki, qarşıdan gələn dünya çempionatı İraq yığmasının tarixində cəmi ikinci belə turnir olacaq. Komanda sonuncu dəfə bu mötəbər yarışda 1986-cı ildə iştirak edib, lakin hər üç matçda məğlub olaraq qrup mərhələsini adlaya bilməyib.

Qeyd edək ki, qlobal futbol bayramı iyunun 11-dən iyulun 19-dək ABŞ, Kanada və Meksikada təşkil olunacaq. Tarixdə ilk dəfə olaraq yarışda 48 komanda mübarizə aparacaq. İraq yığması İ qrupunda yer alıb və onun qrupdakı rəqibləri Fransa, Seneqal və Norveç yığmaları olacaq.