ABŞ Federal Təhqiqat Bürosu (FTB) və Məxfi Xidmət Binance kriptovalyuta birjasına qarşı həyata keçirilən genişmiqyaslı kiberhücumla bağlı araşdırma aparır.

Tvit.az xəbər verir ki, hər iki qurum hadisənin miqyasını müəyyənləşdirmək, oğurlanan vəsaitləri izləmək və geri qaytarmaq üçün müvafiq dövlət və özəl sektor tərəfdaşları ilə əməkdaşlıq edir.

ABŞ Məxfi Xidməti bildirib ki, müstəntiqlər USDC stabilkoininin emitenti Circle də daxil olmaqla tərəfdaşlarla oğurlanan aktivlərin müəyyənləşdirilməsi, dondurulması və geri qaytarılması istiqamətində gecə-gündüz çalışırlar. Qurum həmçinin hücuma görə məsuliyyət daşıyan şəxslərin müəyyən edilərək məsuliyyətə cəlb olunması üçün ABŞ prokurorluğu və hüquq-mühafizə orqanları ilə əməkdaşlıq edir.

Qeyd edək ki, Binance oktyabrın 29-da kiberhücuma məruz qaldığını açıqlayıb. İlkin hesablamalara görə, zərərin 6,3 milyard dollara çata biləcəyi bildirilir. Hadisə ilə əlaqədar birja depozit və vəsait çıxarılması əməliyyatlarını müvəqqəti dayandırıb. Bununla belə, depozitlərin təhlükəsiz olduğu və istifadəçilərin əvvəlki vəsaitlərinə çıxışının qorunduğu qeyd edilib.

Binance blokçeyn sənayesindəki tərəfdaşları ilə əməkdaşlıq nəticəsində təsirlənmiş aktivlərin bir hissəsini dondurmağa nail olub. Təxminən 3 milyard dolların hazırda birbaşa blokçeyndə saxlanıldığı bildirilir.

Aysel Şirinova