Yəməndə davam edən döyüşlər və humanitar vəziyyətin pisləşməsi nəticəsində 280 mindən çox insan evlərini tərk etmək məcburiyyətində qalıb. Bir çox həssas qrup həyati əhəmiyyətli humanitar yardıma çatmaqda çətinlik çəkir.

Tvit.az xəbər verir ki, bu barədə BMT-nin Qaçqınlar üzrə Ali Komissarlığı (UNHCR) məlumat yayıb.

Qurumun bildirdiyinə görə, ölkədə 65 mindən çox qaçqın və sığınacaq axtaran şəxsin vəziyyəti də getdikcə ağırlaşır. Münaqişənin şiddətlənməsi, iqtisadi böhran, resursların tükənməsi və humanitar yardıma çıxışın məhdudlaşması vəziyyəti daha da çətinləşdirir.

Xüsusilə Lahj qubernatorluğundakı Xaraz qaçqın düşərgəsində vəziyyət narahatlıq doğurur. Burada əsasən Somali və Efiopiyadan olan 9 500 qaçqın məskunlaşıb.

UNHCR-in sözçüsü Metyu Saltmarş bildirib ki, qaçqınlar arasında itkilər barədə təsdiqlənmiş məlumat yoxdur. Lakin yaxınlıqdakı silahlı toqquşmalar xidmətlərin dayandırılmasına və insanların hərəkətinin məhdudlaşdırılmasına səbəb olub. Məktəblərin fəaliyyəti dayandırılıb, hüquqi və sənədləşmə xidmətləri ciddi çətinliklərlə üzləşib.

Bununla belə, düşərgə sakinləri ərzaq, tibbi yardım və içməli su ilə təmin olunurlar. Saltmarşın sözlərinə görə, təhlükəsizlik vəziyyəti yardımın çatdırılmasını çətinləşdirir və bir çox məcburi köçkün yardım məntəqələrinə gedə bilmir.

Aysel Şirinova