Dərinin quruması, saç tökülməsi və dırnaqların kövrəkləşməsi çox vaxt yalnız kosmetik problem kimi qəbul edilir. Lakin bəzi hallarda bu dəyişikliklər dəmir, sink, zülal, D vitamini və B qrupu vitaminləri kimi müəyyən qida maddələrinin çatışmazlığı ilə əlaqəli ola bilər.

Tvit.az xəbər verir ki, bu barədə rusiyalı dermatoloq-kosmetoloq Yelizaveta Şuxman Gazeta.ru-ya açıqlamasında bildirib.

Həkimin sözlərinə görə, yalnız xarici əlamətlərə əsaslanaraq vitamin çatışmazlığını müəyyən etmək düzgün deyil. Eyni simptom müxtəlif səbəblərdən yarana bilər. Məsələn, saç tökülməsi dəmir və ya zülal çatışmazlığı ilə bağlı ola bilər, dərinin quruması və dırnaqlardakı dəyişikliklər isə fərqli problemlərdən qaynaqlana bilər.

Mütəxəssis çatışmazlıqların aradan qaldırılmasına ilk növbədə düzgün qidalanmadan başlanılmasını tövsiyə edir. Rasionda ət və balıq, yumurta, süd məhsulları, paxlalılar, tam taxıllı məhsullar, tərəvəz və meyvələr, həmçinin qoz-fındıq və toxumlar mütəmadi olaraq yer almalıdır.

Vitamin və digər qida əlavələrindən isə yalnız ehtiyac olduqda istifadə etmək məsləhətdir. Dəmir preparatları, məsələn, yalnız dəmir çatışmazlığı analizlə təsdiqləndikdə həkim tərəfindən təyin edilə bilər.

Şuxman xəbərdarlıq edib ki, vitaminlərin həddindən artıq qəbulu da problem yarada bilər. Bəzi maddələr orqanizmdə toplana, yüksək dozada qəbul edilən mikroelementlər isə digər maddələrin mənimsənilməsini poza bilər. Buna görə də ehtiyac olmadan bir neçə vitamin kompleksini eyni vaxtda qəbul etmək tövsiyə edilmir.

Həkim əvvəlcə pasiyentin şikayətlərini, qidalanmasını və həyat tərzini qiymətləndirir, daha sonra zəruri analizləri müəyyənləşdirir.

Mütəxəssis vurğulayıb ki, saç, dəri və dırnaqlardakı dəyişikliklər dərhal vitamin almaq üçün deyil, problemin səbəbini araşdırmaq üçün siqnal kimi qəbul edilməlidir. Onların sağlamlığı bir "möcüzəvi" əlavədən deyil, balanslı qidalanmadan, orqanizmin ümumi vəziyyətindən və mövcud problemlərin vaxtında müalicəsindən asılıdır.