Apple qarşıdakı rübdə iPhone, iPad və Mac modellərinin təchizatında ciddi məhdudiyyətlər yaranacağını açıqlayıb.

Tvit.az xarici mediaya istinadən xəbər verir ki, şirkətin baş maliyyə direktoru Kevan Parekh bildirib ki, artan tələb fonunda məhsul mövcudluğu ilə bağlı problemlər güclənəcək. Onun sözlərinə görə, təchizat çatışmazlığı ən çox Apple-ın əsas gəlir mənbələri olan iPhone, Mac və iPad modellərinə təsir edəcək.

Apple həmçinin valyuta məzənnələrindəki dəyişikliklərin maliyyə göstəricilərinə mənfi təsir göstərəcəyini bildirib. Şirkət iPhone satışlarından əldə olunan gəlirin illik müqayisədə təxminən 15% artacağını proqnozlaşdırsa da, məzənnə amili ümumi gəlir artımını təxminən 2,5 faiz bəndi azaldacaq.

Şirkət təchizat probleminin hansı komponentlərlə bağlı olduğunu və məhdudiyyətlərin nə vaxta qədər davam edəcəyini açıqlamayıb.

Apple 2026-cı maliyyə ilinin dördüncü rübündə ümumi gəlirlərinin illik müqayisədə 9-11% artacağını, ümumi mənfəət marjasının isə 47-48% səviyyəsində olacağını proqnozlaşdırır.

Aysel Şirinova