Kontent yaradıcıları və video redaktorları üçün ən böyük problemlərdən biri ideya tapmaq və hazırlanan materialları redaktə etmək üçün davamlı olaraq fərqli tətbiqlər arasında keçid etməkdir. Google və CapCut bu prosesi sadələşdirmək üçün yeni əməkdaşlığa başlayır.

Tvit.az xəbər verir ki, sosial media dünyasında ən populyar video montaj platformalarından biri olan CapCut Google-ın süni intellekt tətbiqi olan Gemini ilə tərəfdaşlıq etdiyini elan edib. Yeni inteqrasiya sayəsində istifadəçilər yaxın vaxtlarda Gemini tətbiqindən çıxmadan şəkil və videolarını birbaşa CapCut alətləri vasitəsilə redaktə edə biləcəklər.

CapCut bu yeniliyi X sosial şəbəkəsində təsdiqləyərək bildirib ki, istifadəçilər “Gemini daxilində olarkən CapCut-un inkişaf etmiş yaradıcılıq və redaktə imkanlarından istifadə edə biləcəklər”.

Şirkətin fikrincə, kontent yaradılmasının gələcəyi daha çox dialoq əsaslı, intuitiv və ağıllı platforma inteqrasiyalarına söykənəcək. Bu isə o deməkdir ki, gələcəkdə istifadəçilər süni intellektə sadəcə tapşırıq verməklə kifayətlənməyəcək, həmin tapşırığın icrası üçün lazım olan bütün alətlərə bir mühitdə çıxış əldə edəcəklər.

Aysel Şirinova