Almaniyanın lüks avtomobil istehsalçısı "Mercedes-Benz", multimedia və rəqəmsal cihazlar panelində yaranan texniki problem səbəbindən 144.049 nəqliyyat vasitəsini geri çağırdığını elan edib. Nasazlıq avtomobil hərəkətdə olarkən ekranların qəfildən sönməsinə və ya yenidən başlamasına yol açır.

​Tvit.az xəbər verir ki, ABŞ Milli Magistral Trafik Təhlükəsizliyi Administrasiyası (NHTSA) tərəfindən təsdiqlənən geriçağırış 2024-2026-cı illər arasında istehsal olunmuş bir neçə məşhur modeli əhatə edir. Problem xüsusilə AMG GT, C-Class, E-Class, SL, CLE və GLC modellərində aşkar edilib.

​“Məlumat-əyləncə sisteminin idarəetmə blokundakı proqram təminatı xətası cihazlar panelinin tamamilə qaralmasına səbəb olur. Sürücülər sürət göstəricisi, xəbərdarlıq işıqları və naviqasiya kimi kritik məlumatları görə bilmirlər ki, bu da qəza riskini əhəmiyyətli dərəcədə artırır”, - deyə texniki sənədlərdə qeyd olunub.

​Məlumata görə, "Mercedes-Benz" bu problemi ötən ildən bəri məsafədən (OTA) proqram yeniləmələri ilə həll etməyə çalışsa da, bəzi avtomobillərdə nasazlığın hələ də qaldığı müəyyən edilib. Şirkət indiyədək bu xəta ilə bağlı hər hansı qəza və ya xəsarət alanın olmadığını bildirib. Avtomobil sahiblərinə rəsmi servis mərkəzlərinə müraciət etmək tövsiyə olunur, burada proqram təminatı ödənişsiz olaraq yenilənəcək.

Aysel Şirinova