Səudiyyə Ərəbistanı Babül-Məndəb boğazı yaxınlığındakı ərazilərə nəzarəti geri qaytarmaq və Qırmızı dənizdə gəmi hərəkətini bərpa etmək məqsədilə husilərə qarşı hərbi əməliyyata hazırlaşır.

Reuters-in regional və Qərb rəsmilərinə istinadən yaydığı məlumata görə, hücum yaxın həftələrdə başlaya bilər. Məlumata əsasən, qurudan döyüşlərdə əsas rolu Ər-Riyadın dəstəklədiyi Yəmən qüvvələri oynayacaq, Səudiyyə Ərəbistanı isə hava zərbələri endirəcək.

Əməliyyatın iki variantı nəzərdən keçirilir: boğaz ərazisində məhdud hərbi əməliyyatın keçirilməsi və ya bir neçə istiqamətdə genişmiqyaslı hücuma başlanılması.

Əməliyyatın miqyasından asılı olaraq 100 mindən çox Yəmən hərbçisinin prosesə cəlb edilə biləcəyi bildirilir.