"45 yaşdan sonra gücü və hərəkətliliyi uzun müddət qorumaq üçün fiziki məşqlərin müntəzəmliyi onların intensivliyindən daha böyük əhəmiyyət daşıyır".

Tvit.az xəbər verir ki, bu barədə livanlı həkim-reabilitoloq Abdelkader Hamavi "RIA Novosti"yə açıqlamasında bildirib.

Ekspertin sözlərinə görə, bu tövsiyə xüsusilə 60 yaşdan yuxarı insanlar üçün daha aktualdır. O, sümük sıxlığını və əzələ kütləsini qorumaq üçün həftədə iki-üç dəfə ayaq məşqləri, dartınma və çöməlmə kimi müqavimət hərəkətləri etməyi tövsiyə edib.

Bununla yanaşı, oynaqların hərəkətliliyini, çevikliyi və tarazlığı inkişaf etdirmək, həmçinin hər gün piyada gəzmək faydalıdır. Həkim kardioməşq kimi insanın fiziki vəziyyətinə uyğun olaraq velosiped sürməyi, üzməyi və ya sürətli templə gəzməyi məsləhət görüb.

"Əsas məsələ uzun müddət oturaq vəziyyətdə qalmamaq və gün ərzində mümkün qədər çox hərəkət etməyə çalışmaqdır", - deyə Hamavi vurğulayıb.

Mütəxəssis əlavə edib ki, insanı bütün xəstəliklərdən qoruyacaq universal idman hərəkəti yoxdur. Lakin müntəzəm tibbi müayinələr, sağlam yuxu və düzgün qidalanma ilə müşayiət olunan davamlı fiziki aktivlik yaşla əlaqədar yaranan problemlərin riskini əhəmiyyətli dərəcədə azalda bilər.