ABŞ Prezidenti Donald Tramp süni intellekt sektorunun inkişafının yavaşladılmasına və daha sərt tənzimlənməsinə qarşı olduğunu bildirib.

Tvit.az xarici mediaya istinadən xəbər verir ki, Tramp ABŞ-ın Çinlə qlobal texnoloji liderlik yarışında üstünlüyünü qorumasının vacibliyini vurğulayıb.

Jurnalistlərin suallarını cavablandıran Tramp ABŞ-ın süni intellekt sahəsində Çindən öndə olduğunu və bu üstünlüyün qorunmasını istədiyini deyib.

“Əlbəttə ki, mən istəyirəm ki, bu cür qalsın, çünki süni intellekt yarışında qalib gələn şəxs son qələbəni qazanır”, – deyə Tramp bildirib.

O, süni intellekt sektorunun sürətli inkişafının qarşısının alınması ilə bağlı çağırışları da rədd edib. Tramp bəzi “mənfi qüvvələrin” hələ reallaşmamış hipotetik riskləri şişirtdiyini bildirib.

ABŞ Prezidenti müəyyən təhlükəsizlik tədbirlərinin görülə biləcəyini etiraf etsə də, əsas prioritetin ölkənin texnoloji üstünlüyünün qorunması olduğunu vurğulayıb.

Trampın açıqlamaları süni intellekt modellərinin inkişaf tempinin yavaşladılmasının zəruriliyi ilə bağlı müzakirələrin intensivləşdiyi bir vaxta təsadüf edib.

Bu yaxınlarda ABŞ-da yerləşən Anthropic şirkətinin baş direktoru Dario Amodei şirkətlərin süni intellekt modellərinin inkişaf sürətini azaltmalı olduğunu bildirən məqalə dərc edib. Bu çağırış OpenAI-nin baş direktoru Sem Altman, Google DeepMind-in baş direktoru Demis Hassabis və Elon Musk kimi sənaye nümayəndələri tərəfindən dəstəklənib.

Aysel Şirinova