WhatsApp hesabların təhlükəsizliyini artırmaq məqsədilə yeni funksiyalar təqdim edib. Yeniliklərə daha güclü iki addımlı doğrulama sistemi, Android cihazlarında keçid açarlarının (passkey) istifadəsinin genişləndirilməsi və naməlum zənglərlə bağlı əlavə məlumatların təqdim edilməsi daxildir.

Tvit.az xəbər verir ki, şirkətin açıqlamasına görə, yeni funksiyalar xüsusilə fişinq və digər kiberhücumların mürəkkəbləşdiyi bir dövrdə istifadəçilərin hesablarını daha effektiv qorumasına kömək edəcək.

Yeni sistem iki addımlı doğrulama zamanı istifadə olunan ənənəvi altı rəqəmli PİN kodlara alternativ təqdim edir. Bununla yanaşı, Android istifadəçiləri üçün keçid açarlarının dəstəyi genişləndirilir. Bu texnologiya hesabın qorunması üçün cihazın biometrik məlumatlarından, ekran kilidindən və ya digər təhlükəsiz autentifikasiya üsullarından istifadə etməyə imkan verir.

WhatsApp həmçinin naməlum nömrələrdən daxil olan zənglərlə bağlı istifadəçilərə daha çox kontekstual məlumat təqdim etməyə başlayır. Şirkət hesab edir ki, bu yeniliklər istifadəçilərə şübhəli fəaliyyətləri daha asan müəyyənləşdirməyə və hesablarını kiberhücumlardan qorumağa imkan verəcək.

Aysel Şirinova