Mavriki Prezidenti Daramber Qoxul iyunun 23-də "Dinlər Sülh uğrunda" təşkilatının Ümumdünya Şurasının həmprezidenti, Qafqaz Müsəlmanları İdarəsinin sədri şeyxülislam Allahşükür Paşazadəni qəbul edib.

Tvit.az xəbər verir ki, A.Paşazadə bu yaxınlarda Ümumdünya Şəhərsalma Forumunun 13-cü sessiyası (WUF13) çərçivəsində Mavriki Prezidentinin Azərbaycana səfərini xatırladıb və Prezident İlham Əliyevin salamlarını Daramber Qoxula çatdırıb.

Mavriki Prezidenti isə öz növbəsində bildirib ki, Azərbaycan gözəl, qonaqpərvər ölkədir və müdrik prezidenti var. O da salamlarını Prezident İlham Əliyevə xahiş edib. Daramber Qoxul həmçinin Azərbaycanda səfərdə olarkən dini məbədi – Bibiheybət məscid-kompleksini ziyarət etdiyini xüsusi vurğulayıb.

Xatırladaq ki, A.Paşazadə "Dinlər Sülh Uğrunda" təşkilatının 2026-cı il Ümumdünya Şurasının iyunun 23-26-da keçirilən illik toplantısında iştirak etmək üçün Mavrikidə səfərdədir. Şeyxülislam 2025-ci ildə "Dinlər Sülh Uğrunda" təşkilatının Ümumdünya Şurasının həmprezidenti seçilib və baş katib Dr. Frensis Kurianın dəvəti ilə builki toplantıda məhz bu statusda iştirak edir.

Tədbir Mavriki Prezidentinin iştirakı ilə "Dinlər Sülh Uğrunda" təşkilatının Ümumdünya Şurası öz işinə müxtəlif din xadimlərinin duaları ilə başlayıb. Builki mövzusu "Müştərək mübarək tərəqqiyə doğru yolların qurulması"dır. A.Paşazadə toplantının "Süni intellekt - insan hüquqları, ləyaqəti və süni intellektin çoxdinli perspektivləri" xüsusi sessiyasında çıxış edəcək.

"Dinlər Sülh Uğrunda" təşkilatı yarım əsrdən artıq tarixə malik, dünyanın ən böyük və genişşaxəli beynəlxalq dinlərarası sülhməramlı qurumudur.