Çinin Bazar Tənzimləməsi üzrə Dövlət Administrasiyası bildirib ki, Zhejiang Geely Automobile Co., Ltd. şirkəti LiDAR sistemlərindəki nasazlıq səbəbilə təxminən 93 min avtomobili geri çağırır.

Tvit.az xarici mediaya istinadən xəbər verir ki, geri çağırış çərçivəsində 8 yanvar 2025-ci ildən 12 dekabr 2025-ci ilədək istehsal olunan 74 037 Lynk & Co avtomobili, o cümlədən Lynk & Co 900, Lynk & Co 10 EM-P, Lynk & Co 07 və Lynk & Co 08 modelləri servisə cəlb ediləcək.

Nasazlığın təchizatçı səviyyəsindəki istehsal problemi ilə əlaqədar olduğu bildirilir. Belə ki, bəzi LiDAR qurğularının daxilindəki güc inteqral sxemi istehsal prosesində zədələnmiş ola bilər.

Bu qüsur avtomobilin sürücüyə yardım sistemləri aktiv olduqda müəyyən obyektləri lazımi səviyyədə aşkar edə bilməməsinə, onlar barədə xəbərdarlıq verməməsinə və ya uyğun idarəetmə tədbiri görməməsinə səbəb ola bilər. Bu isə müəyyən hallarda təhlükəsizlik riski yarada bilər.

Şirkət nasaz LiDAR qurğularını pulsuz şəkildə dəyişdirəcək.

Bundan əlavə, eyni səbəbdən 18 878 Galaxy M9 avtomobilinin də geri çağırıldığı bildirilir. Beləliklə, iki marka üzrə geri çağırılan avtomobillərin ümumi sayı təxminən 93 minə çatır.

Jiemian News-un məlumatına görə, 2025-ci ildə qeyd olunan dörd Lynk & Co modelinin ümumi satışları 147 800 avtomobil təşkil edib. Bu isə həmin modellərin təxminən yarısının geri çağırışdan təsirləndiyini göstərir.

Aysel Şirinova