Azərbaycan-Ermənistan dövlət sərhədinin delimitasiyası və demarkasiyası ilə bağlı ikitərəfli komissiya yaradılacaq.
Tvit.az verdiyi məlumata görə, bu barədə Azərbaycan, Rusiya və Ermənistan liderlərinin 26 noyabr 2021-ci il tarixli Soçi görüşünün yekunları ilə bağlı imzalanan birgə üçtərəfli bəyanatda bildirilib.
“Azərbaycan-Ermənistan sərhədində sabitliyin və təhlükəsizliyin səviyyəsinin yüksəldilməsi üçün addımlar atmağa və tərəflərin sorğusu əsasında Rusiyanın məsləhətçi yardımı ilə Azərbaycanla Ermənistan arasında dövlət sərhədinin delimitasiyası və demarkasiyası ilə bağlı birgə komissiyanın yaradılması üzrə iş aparılması ilə bağlı razılığa gəldik”, deyə bəyanatda qeyd olunub.
