Ermənistanın Baş naziri Nikol Paşinyan ölkə hakimiyyətinin Türkiyə ilə münasibətləri normallaşdırmağa hazır olduğunu bəyan edib.
Tvit.az-ın “Sputnik Armenia”ya istinadən verdiyi xəbərə görə, Paşinyan bu barədə bu gün hökumətin iclasında bildirib.
O deyib ki, Türkiyə Prezidenti Rəcəb Tayyib Ərdoğan Ermənistanla münasibətlərinin normallaşmasının mümkünlüyü barədə açıq şəkildə danışıb:
“Biz bu açıqlamalarda Ermənistan-Türkiyə münasibətlərinin normallaşmasının, avtomobil və dəmir yol əlaqələrinin bərpasının mümkünlüyünü müzakirə etmək üçün bir fürsət görürük”.
Paşinyan daha geniş nəticələr əldə etməyə imkan verəcək danışıqlara hazır olduqlarını bəyan edib.
O bildirib ki, söhbət regionu Şimalı Cənubla, Şərqi Qərblə bağlayacaq bir qovşağa çevirməkdən gedir.
N. Paşinyan qeyd edib ki, Rusiya bu prosesə kömək etməyə hazırdır.