Bu gün Dövlət Sərhəd Xidmətinin (DSX) helikopteri təlim məqsədi ilə Səngəçal aerodromundan qalxaraq “Qaraheybət” təlim mərkəzinə eniş edərkən qəzaya uğrayıb.
Tvit.az-ın məlumatına görə, bunu Dövlət Sərhəd Xidmətinin rəisi, general-polkovnik Elçin Quliyev deyib.
“Bu gün – 30 noyabrda DSX-nın Mİ-17 tipli 20136 bort nömrəli helikopteri təlim məqsədilə Səngəçal aerodromundan saat 10:16-da havaya qalxaraq “Qaraheybət” təlim meydanı istiqamətinə hərəkətlənib. Helikopter saat 10:36-da təlim meydanında təyin olunmuş meydançaya eniş edərkən qəzaya uğrayıb”, – deyə DSX rəisi bildirib.
General qəza nəticəsində həlak olanların ailələrinə başsağlığı verib.
Elçin Quliyev hadisə nəticəsində yaralanan şəxslərin DSX-nin hospitalında müalicə olunduqlarını deyib.
