Gürcüstanın keçmiş prezidenti Mixeil Saakaşvili həbs edildikdən sonra ona qarşı irəli sürülən ittihamlarla razılaşmayaraq aclıq elan edib və özünü siyasi məhbus hesab edir.
Tvit.az xəbər verir ki, bu bunu Gürcüstanın Ombudsmanı Nino Lomjaria Saakaşvilini həbsxanada ziyarət etdikdən sonra jurnalistlərə açıqlamasında bildirib.
“O, ittihamlarla razılaşmadığı və özünü siyasi məhbus hesab etdiyi üçün aclıq aksiyası keçirir” dedi.
Bu arada ABŞ Dövlət Departamentinin mətbuat katibi Ned Prays Saakaşvilinin həbs edilməsinə münasibət bildirərkən deyib ki, Ağ Ev Gürcüstandakı hadisələri yaxından izləyir: “Biz Gürcüstanın səlahiyyətlilərini cənab Saakaşvilinin Gürcüstan qanunvericiliyi və Gürcüstanın beynəlxalq insan haqları öhdəliklərinə uyğun şəkildə bərabərlik prinsipindən yararlanmasını təmin etməyə çağırırıq”.
Saakaşvili cəzaçəkmə müəssisəsindən tərəfdarlarına məktub göndərib. O, Kiyevdən Gürcüstana gələrkən saxlanılacağını gözlədiyini bildirib.
“Mənim azadlığım və daha önəmlisi Gürcüstanın azadlığı sizin fəallığınız və yaxın günlərdəki mübariz ruhunuzdan asılı olacaq. Beynəlxalq dəstək də bundan asılıdır. Xahiş edirəm, şübhə etməyin və sona qədər inanın ki, qələbəmiz öz əlimizdədir. Sizi sevirəm”, – məktubda deyilir.
Qeyd edək ki, Saakaşvili barədə bankir Sandro Girgvlianinin öldürülməsi və deputat Valeri Gelaşvilinin döyülməsi işi ili bağlı ittihamlar irəli sürülüb. Birinci halda onu 3 il, ikinci halda isə 6 il azadlıqdan məhrumetmə gözləyir. Bundan əlavə, Saakaşvili 7 noyabr 2007-ci il tarixdə müxalifətin mitinqinin dağıdılması, dövlət büdcəsindən vəsaitlərin mənimsənilməsi kimi işlərdə də adı hallandırılır. Hazırda məhkəmə tərəfindən işlər araşdırılır, hələlik heç bir hökm verilməyib.
